消息及報導

做媽媽就梗係都想每分每秒都抱住個B㗎啦，但係如果湊B嗰陣姿勢唔啱，分分鐘好大鑊㗎！
萬一患上「媽媽手」，手指公同手腕都會好痛，連做少少嘢都無力，到時莫講話湊B，就連扭條毛巾都扭唔到呀！

預防「媽媽手」包括以下三大重點，快啲繼續睇落去啦！

1) 正確姿勢
雖然知道各位媽媽好肉緊，但抱BB嗰陣記得唔好過份用力，唔好淨係喺虎口位出力呀。抱BB嘅時候要合實手指，手掌同手腕成一條直條，再用手臂嘅力去托住BB，咁樣嘅話BB有幾重都hold得住啦！

2) 適當休息
媽媽要避免用比較細嘅關節同肌肉去做長時間、經常重複嘅動作，亦可以試下左右手交替咁抱，又或者每隔一段時間，放自己一個break，比手指、手腕同埋手臂去抖抖。

3) 伸展運動
休息個陣記得多做正確嘅伸展運動，令手部嘅筋腱可以充分嘅紓緩，減低受傷嘅機會。另外仲可以做強化手腕肌肉運動加強肌力，抱耐啲都唔驚手軟啦！

如果妳已經有「媽媽手」，記得唔好隨便按摩，要搵醫生去做個詳細嘅檢查！大部分「媽媽手」都可以透過非手術治療去改善，所以各位媽媽都唔洗咁擔心！

媽媽們要記得以上小貼士，唔好比「媽媽手」有機可乘呀！